SUN 15 JUN, 2025, 3:23 PM IST
കൊയിലാണ്ടി: ട്രെയിനില്‍ നിന്നു വീണു പരിക്കേറ്റ പയ്യോളി സ്വദേശി മരിച്ചു. അരങ്ങാടത്ത് പട്ടേരി റയീസ് (33) ആണ് മരിച്ചത്. 12686 മംഗലാപുരം-ചെന്നൈ സൂപ്പര്‍ഫാസ്റ്റ് എക്‌സ്പ്രസില്‍ നിന്നാണ് കൊയിലാണ്ടിക്ക് സമീപം വീണത്. തുടർന്ന് ഇദ്ദേഹത്തെ കൊയിലാണ്ടി താലൂക്ക് ആശുപത്രിയിലും പിന്നീട് കോഴിക്കോട് സ്വകാര്യ ആശുപത്രിയിലും പ്രവേശിപ്പിച്ചെങ്കിലും രക്ഷിക്കാനായില്ല.
തിങ്കളാഴ്ച രാത്രി എട്ടേ കാലോടെ കൊയിലാണ്ടിക്കും ചെങ്ങോട്ടുകാവിനുമിടയിലാണ് അപകടം. ട്രെയിനില്‍ നിന്നു വീഴുന്നത് കണ്ട യാത്രക്കാര്‍ ചെയിന്‍ വലിക്കുകയായിരുന്നു. ട്രെയിന്‍ പൊയില്‍ക്കാവില്‍ നിര്‍ത്തിയ ശേഷം കൊയിലാണ്ടി പോലീസും അഗ്‌നി രക്ഷാ സേനയും തെരച്ചില്‍ നടത്തുന്നതിനിടെ ചെങ്ങോട്ടുകാവില്‍ നിന്നാണ് റയീസിനെ കണ്ടെത്തിയത്. വിദേശത്തേക്ക് പോവുന്നതിനാവശ്യമായ മെഡിക്കല്‍ ചെക്കപ്പിന് ചെന്നൈയിലേക്ക് പോകുമ്പോഴാണ് അപകടത്തില്‍പെട്ടത്. എരിപ്പറമ്പില്‍ റസാഖിന്റെയും ജമീലയുടെയും മകനാണ് റയീസ്. ഭാര്യ: ആയിഷ. മകന്‍: ആദം ഇഷാന്‍.
