നാദാപുരം : ഓട്ടോ ഡ്രൈവർ എം ഡി എം എ യുമായി പോലീസ് പിടിയിൽ. ചേലക്കാട് സ്വദേശി മണ്ടോടി താഴെ കുനി പി.പി. റംഷിദ് ( 27 ) നെയാണ് നാദാപുരം എസ് ഐ അനീഷ് വടക്കേടത്ത് അറസ്റ്റ് ചെയ്തത്. പ്രതിയിൽ നിന്ന് പോയൻ്റ് 84 ഗ്രാം എം ഡി എം എ പോലീസ് പിടികൂടി. ചൊവ്വാഴ്ച്ച രാത്രി 10 മണിയോടെ ചേലക്കാട് ടൗണിൽ വാഹന പരിശോധനക്കിടെ കക്കട്ട് ടൗൺ കേന്ദ്രീകരിച്ച് സർവീസ് നടത്തുന്ന കെ എൽ 18 എഡി 5413 നമ്പർ ഓട്ടോയിൽ നടത്തിയ പരിശോധനയിലാണ് റംഷിദ് പിടിയിലായത്. ഓട്ടോ പോലീസ് കസ്റ്റഡിയിലെടുത്തു. രാത്രി കാലങ്ങളിൽ നാദാപുരം , കല്ലാച്ചി ടൗണുകൾ കേന്ദ്രീകരിച്ച് എം ഡി എം എ വിൽപ്പന നടത്തുന്ന സംഘത്തിലെ പ്രധാന കണ്ണിയാണ് പ്രതിയെന്ന് പോലീസ് പറഞ്ഞു.