നാദാപുരം: പുളിയാവിൽ അപകടകരമായി വാഹനമോടിച്ച് വിവാഹ സംഘത്തിന്റെ റീൽസ് ചിത്രീകരിച്ച സംഭവത്തിൽ നാല് പേർ അറസ്റ്റിൽ. റീൽസ് ചിത്രീകരണത്തിൽ പങ്കെടുത്ത ഏഴ് വാഹനങ്ങൾ പോലീസ് തിരിച്ചറിഞ്ഞു. സംഭവത്തിൽ പങ്കെടുത്ത അഞ്ച് വാഹനങ്ങൾ പോലീസ് പിടികൂടി. കല്ലാച്ചി സ്വദേശികളായ തൈ വെച്ച പറമ്പത്ത് ടി.പി മുഹമ്മദ് സഫ്വാൻ (23), പൂലാറോത്ത് സി.കെ. അനസ് (26), ഈയ്യങ്കോട് തയ്യുള്ളതിൽ ടി. മുഹമ്മദ് (19), കല്ലാച്ചി തുണ്ടിയിൽ മുഹമ്മദ് സയ്യിദ് ( 20 ) എന്നിവരെ വളയം പോലീസ് അറസ്റ്റ് ചെയ്തു. 

കഴിഞ്ഞ ഞായറാഴ്ച കല്ലാച്ചിയിൽ നിന്നും പുളിയാവിലേക്കുള്ള യാത്രക്കിടെയാണ് വിവാഹ പാർട്ടി റീൽസ് ചിത്രീകരിച്ചത്. കാറിന്റെ ഡോറിൽ ഇരുന്നും, മുകളിൽ പൂത്തിരികത്തിച്ചും, പടക്കം പൊട്ടിച്ചുമായിരുന്നു യുവാക്കളുടെ യാത്ര. വിവാഹ സംഘം ഷൂട്ട് ചെയ്ത ദൃശ്യങ്ങൾ സാമൂഹിക മാധ്യമങ്ങളിൽ പ്രചരിച്ചതോടെയാണ് വളയം പൊലീസ് സംഭവത്തിൽ കേസെടുത്തത്.