തിരുവനന്തപുരം: ബക്രീദ് പ്രമാണിച്ച് സംസ്ഥാനത്തെ എല്ലാ വിദ്യാഭ്യാസ സ്ഥാപനങ്ങള്‍ക്കും നാളെയും (06.06.2025 വെള്ളിയാഴ്ച) അവധി. വിദ്യാഭ്യാസമന്ത്രി വി. ശിവന്‍കുട്ടി, ഉന്നത വിദ്യാഭ്യാസമന്ത്രി ഡോ. ആര്‍.ബിന്ദു എന്നിവര്‍ ഫെയ്സ്ബുക്ക് പോസ്റ്റിലൂടെയാണ് ഇക്കാര്യം അറിയിച്ചത്.ബക്രീദ് ദിനമായ ശനിയാഴ്ച നേരത്തെതന്നെ പൊതുഅവധി പ്രഖ്യാപിച്ചിരുന്നു.

ബക്രീദ്: സംസ്ഥാനത്തെ എല്ലാ വിദ്യാഭ്യാസ സ്ഥാപനങ്ങള്‍ക്കും വെള്ളിയാഴ്ച അവധി

Kerala

വടകര : ഭരണസ്വാധീനം ഉപയോഗിച്ച് ഉദ്യോഗസ്ഥരെ ചൊൽപ്പടിക്കു നിർത്തി അശാസ്ത്രീയമായും, എല്ലാ മാനദണ്ഡങ്ങളും കാറ്റിൽ പറത്തിയും, വാർഡ് വിഭജനം നടത്തി തദ്ദേശ സ്വയംഭരണ സ്ഥാപനങ്ങളിലെ വാർഡുകൾ പിടിച്ചെടുക്കാനുള്ള സി പി ഐ എം നീക്കത്തിനെതിരെ പ്രത്യക്ഷസമരപരിപാടികളും, നിയമ പോരാട്ടങ്ങളുമായി കോൺഗ്രസ്സ് മുന്നോട്ട് പോകുമെന്ന് ഡി സി സി പ്രസിഡന്റ് അഡ്വ കെ പ്രവീൺ കുമാർ പറഞ്ഞു. വിഭജിക്കപ്പെട്ട പല വാർഡുകൾക്കും അതിരുകൾ ഇല്ല. വോട്ടർമാരുടെ എണ്ണത്തിലും കൃത്യതയില്ല. പിണറായി സർക്കാറിനെതിരായ ജനവികാരത്തെ വാർഡ് വിഭജനത്തിലൂടെ തടയാമെന്നാണ് സി പി ഐ എം കരുതുന്നതെന്നും പ്രവീൺ കുമാർ പറഞ്ഞു.
വടകര താലൂക്കിലെ കോൺഗ്രസ്സ് നേതൃസംഗമം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ഡി സി സി ജന: സെക്രട്ടറി രാധാകൃഷ്ണൻ കാവിൽ അദ്ധ്യക്ഷത വഹിച്ചു. സതീശൻ കുരിയാടി, ബാബു ഒഞ്ചിയം, ആവോലം രാധാകൃഷ്ണൻ, മോഹനൻ പാറക്കടവ്, ശ്രീജേഷ് ഊരത്ത്, ജമാൽകോരങ്കോട്, പറമ്പത്ത് പ്രഭാകരൻ എന്നിവർ സംസാരിച്ചു.

തദ്ദേശ സ്വയംഭരണ സ്ഥാപനങ്ങൾ പിടിച്ചെടുക്കാനുള്ള സി പി ഐ എം നീക്കത്തിനെതിരെ പ്രക്ഷോഭം സംഘടിപ്പിക്കും; കെ പ്രവീൺ കുമാർ

Vadakara

ആയഞ്ചേരി: പരിസ്ഥിതി ദിനാചരണത്തിൻ്റെ ഭാഗമായി 'പ്രകൃതിയുടെ സംരക്ഷകരായ് നമ്മളുണ്ടാവണം, എന്ന സന്ദേശമുയർത്തി കടമേരി എൽ പി സ്കൂൾ വിദ്യാർത്ഥികൾ അവതരിപ്പിച്ച ഫ്ലേഷ് മോബ് ജനശ്രദ്ധ ആകർഷിച്ചു. പൂർവ്വ വിദ്യാർത്ഥിയായ സൂരജ് കുറ്റിയിൽ, ആദിത്യ എന്നിവർ സംവിധാനം ചെയ്ത പരിപാടി സ്കൂൾ ഗ്രൗണ്ടിൽ ഒരുക്കിയ ചടങ്ങിൽ വെച്ച് ആയഞ്ചേരി ഗ്രാമ പഞ്ചായത്ത് സ്റ്റാൻ്റിഗ് കമ്മിറ്റി ചെയർമാൻ ടി.വി. കുഞ്ഞിരാമൻ ഉദ്ഘാടനം ചെയ്തു.
പ്രധാന അധ്യാപിക കെ ആശ അധ്യക്ഷം വഹിച്ചു. രാജീഷ കെ.വി, ശ്രുതി കെ, ബാബുരാജ് സി, സൂരജ് കുറ്റിയിൽ, ആദിത്യ എന്നിവർ സംസാരിച്ചു. ആയഞ്ചേരി ടൗൺ, ആയഞ്ചേരി ബസ്സ് സ്റ്റാൻ്റ്, കെ.വി. പീടിക, മാക്കം മുക്ക് ബസ്സ് സ്റ്റോപ്പ്, കടമേരി തെരു എന്നീ കേന്ദ്രങ്ങളിൽ പരിപാടി അവതരിപ്പിച്ച് കുട്ടികൾ ജനങ്ങളുടെ കൈയ്യടി നേടി.

പരിസ്ഥിതി ദിനത്തിൽ ഫ്ലാഷ് മോബുമായി വിദ്യാർത്ഥികൾ

അരൂർ: ആയുർവേദ മെഡിക്കൽ അസോസിയേഷൻ ഓഫ് ഇന്ത്യ കുറ്റ്യാടി ഏരിയ കമ്മിറ്റിയും അരൂർ യു.പി സ്‌കൂളും സംയുക്തമായി സംഘടിപ്പിച്ച ഉദ്യാന നിർമ്മാണവും പരിചയ ക്ലാസും തൂണേരി ബി.പി.ഒ ടി സജീവൻ ഉദ്ഘാടനം ചെയ്തു. ഡോ. ഒ. പിഫാദിയ നാദിൽ ക്ലാസെടുത്തു. പ്രധാന അധ്യാപകൻ എൽ.ആർ സജിലാൽ അധ്യക്ഷത വഹിച്ചു. മാധ്യമ പ്രവർത്തകൻ പി.കെ രാധാകൃഷ്ണൻ, ഡോ :എം ജാസിൽ , പി.കെ അനുപമ, കെ അമൽ രാജ് എന്നിവർ പ്രസംഗിച്ചു.

ഉദ്യാന നിർമ്മാണവും പരിചയ ക്ലാസും സംഘടിപ്പിച്ചു

Nadapuram

വടകര: എസ് ജി എം എസ് ബി സ്കൂളിൽ ലോക പരിസ്ഥിതി ദിനത്തിൽ ഹരിത കർമ്മ സേനാംഗങ്ങളെ ആദരിച്ചു. പ്രകൃതിയെ സംരക്ഷിക്കാനും പരിസ്ഥിതിയെ സംരക്ഷിക്കുന്നതിൽ പ്രോത്സാഹനമാകാനും മുന്നിലുണ്ടായ വടകര നഗരസഭ ഒൻപതാം വാർഡ് ഹരിതസേനാംഗങ്ങളായ സന്ധ്യ, ജിഷ, ഷബിജ, ജിനിഷ എന്നിവരുടെ മാതൃകാപരമായ ഇടപെടലിനാണ് ആദരവ്. പ്രധാനാധ്യാപിക കെ ശ്രീജ, എ ഉമേഷ്‌ കുമാർ, കെ കെ ബിന്ദു, കെ നിഷ, ബി ശാലിനി, സി നിജിൻ, പി എൻ അർജുൻ, കെ ബിനു, ആഷ് വിൻദേവ്, ആര്യവ് ശ്രീജിത്ത്, നിഹാൽ ദേവ്, ധാർമ്മിക് എന്നിവർ നേതൃത്വം നൽകി.

ഹരിത കർമ്മ സേനാംഗങ്ങളെ ആദരിച്ചു

കോഴിക്കോട് : താമരശേരിയിൽ പത്താം ക്ലാസ് വിദ്യാർത്ഥി ഷഹബാസിനെ മർദ്ദിച്ചു കൊന്ന കേസിൽ പ്രതികളായ അഞ്ച് വിദ്യാർത്ഥികളും പ്ളസ് വൺ പ്രവേശനം നേടി. മൂന്നുപേർ താമരശേരി ഗവൺമെന്റ് വൊക്കേഷണൽ ഹയർസെക്കൻഡറി സ്‌കൂളിലും ഒരാൾ സെന്റ് ജോസഫ് എച്ച്‌എസ്‌എസിലും മറ്റൊരാൾ ഗവൺമെന്റ് വിഎച്ച്‌എസ്‌എസ് കുറ്റിച്ചിറയിലുമാണ് പ്രവേശനം നേടിയത്. താമരശേരിയിൽ രണ്ട് വിദ്യാർത്ഥികൾ താത്‌കാലികമായും ഒരാൾ സ്ഥിരപ്രവേശനവുമാണ് നേടിയത്.സ്വഭാവ സർട്ടിഫിക്കറ്റ് തൃപ്തികരമല്ല എന്ന റിപ്പോ‌ർട്ട് ആണ് സ്‌കൂൾ അധികൃതർ കുറ്റാരോപിതരായ വിദ്യാർത്ഥികൾക്ക് നൽകിയതെങ്കിലും ഇക്കാരണത്താൽ പ്രവേശനം നിഷേധിക്കാനാവില്ല എന്ന നിർദേശമാണ് വിദ്യാഭ്യാസ വകുപ്പിൽ നിന്ന് സ്‌കൂളിന് ലഭിച്ചത്.&nbsp;
അതിനിടെ പ്രവേശനം നേടാനായി പൊലീസ് അകമ്പടിയോടെ കുട്ടികളുമായി എത്തിയ വാഹനം കെഎസ്‌യു, എംഎസ്‌എഫ് പ്രവർത്തകർ തടഞ്ഞു. ഇവരെ പൊലീസ് അറസ്റ്റുചെയ്ത് നീക്കി. പ്രവേശനത്തിനുശേഷം കുട്ടികളെ വെള്ളിമാടുകുന്ന് ജുവനൈൽ ഹോമിൽ തിരികെ എത്തിച്ചു.ആറ് പ്രതികൾക്കും നേരിട്ടോ ഓൺലൈനായോ പ്രവേശനത്തിനായി ഹാജരാകാൻ സൗകര്യമൊരുക്കണമെന്ന് ഹൈക്കോടതി നിർദേശിച്ചിരുന്നു. ഇതിനായി ഇന്ന് രാവിലെ 10 മുതൽ വൈകിട്ട് അഞ്ചുവരെ തടവിൽ ഇളവ് നൽകുകയും ചെയ്തു. ഇവരെ നേരിട്ട് സ്കൂളിൽ എത്തിക്കണമെങ്കിൽ മതിയായ സംരഷണം നൽകണമെന്ന് താമരശേരി എസ്.എച്ച്.ഒയോടും ഒബ്സർവേഷൻ ഹോം സൂപ്രണ്ടിനോടും കോടതി നിർദ്ദേശിച്ചിരുന്നു.&nbsp;

ഷഹബാസ് കൊലക്കേസ്; പ്രതികളായ അഞ്ച് വിദ്യാർത്ഥികളും പ്ളസ് വൺ പ്രവേശനം നേടി

Kozhikode

തിരുവനന്തപുരം: സംസ്ഥാനത്ത് ഈ മാസം പത്ത് മുതൽ ട്രോളിംഗ് നിരോധനം. ഇന്നുച്ചേർന്ന മന്ത്രിസഭാ യോഗത്തിലാണ് തീരുമാനം. ജൂൺ ഒൻപത് അർദ്ധരാത്രി മുതൽ ജൂലായ് 31 അർദ്ധരാത്രിവരെ 52 ദിവസമാണ് ട്രോളിംഗ് നിരോധനം ഏർപ്പെടുത്തിയത്. ഇത് സംബന്ധിച്ച വിജ്ഞാപനം പുറപ്പെടുവിച്ചു.ട്രോളിംഗ് നിരോധന കാലയളവിൽ കേരള തീരത്ത് മത്സ്യബന്ധന ബോട്ടുകൾ കടലിൽ പോകുവാനോ മത്സ്യബന്ധനം നടത്താനോ പാടുള്ളതല്ലെന്ന് ഫിഷറീസ് വകുപ്പ് അറിയിച്ചു.&nbsp;
കടലോരമേഖലകളിൽ പൊലീസ് നിരീക്ഷണവും കടൽ നിരീക്ഷണവും ശക്തമാക്കുന്നതിന് എ.ഡി.എം ഇൻ ചാർജ് കെ.വി. ശ്രുതിയുടെ അദ്ധ്യക്ഷതയിൽ ചേർന്ന ട്രോളിംഗ് നിരോധന മുന്നൊരുക്ക യോഗം തീരുമാനിച്ചു. സുരക്ഷ മാനദണ്ഡങ്ങൾ കർശനമാക്കിയതിനാൽ പരമ്പരാഗത യാനങ്ങളിൽ ആധാർ, രജിസ്‌ട്രേഷൻ സർട്ടിഫിക്കറ്റ്, ലൈസൻസ് എന്നിവയുള്ള തൊഴിലാളികളെ മാത്രമേ മത്സ്യബന്ധനത്തിന് അയക്കാവൂ എന്ന് ഉടമകൾക്ക് നിർദേശം നൽകി.
മറ്റ് നിർദേശങ്ങൾ
ട്രോളിംഗ് നിരോധനം തുടങ്ങുന്ന ഒമ്പതിന് അർദ്ധരാത്രി 12 മണിക്ക് മുമ്പായി എല്ലാ ബോട്ടുകളും ഹാർബറുകളിൽ പ്രവേശിക്കണം. കേരള തീരത്ത് മത്സ്യബന്ധനം നടത്തിക്കൊണ്ടിരിക്കുന്ന അന്യസംസ്ഥാന ബോട്ടുകൾ ഒമ്പതിന് മുമ്പായി തീരം വിട്ട് പോകേണ്ടതാണ്. ട്രോളിംഗ് നിരോധന കാലയളവിൽ മത്സ്യബന്ധനത്തിൽ ഏർപ്പെടുന്ന ഇൻബോർഡ് വള്ളങ്ങൾ (താങ്ങുവള്ളം) ഒരു കാരിയർ വള്ളം മാത്രമേ ഉപയോഗിക്കാൻ പാടുള്ളൂ. രണ്ട് വള്ളങ്ങൾ ഉപയോഗിച്ചുള്ള പെയർ ട്രോളിംഗ് അഥവാ ഡബിൾ നെറ്റ് കർശനമായും നിരോധിച്ചിട്ടുള്ളതും ശിക്ഷാർഹവുമാണ്.

സംസ്ഥാനത്ത് ജൂൺ പത്തുമുതൽ 52 ദിവസത്തേയ്ക്ക് ട്രോളിംഗ് നിരോധനം

കുറ്റ്യാടി: കുട്ടികളെ മയക്കുമരുന്ന് നൽകി ലൈംഗികമായി പീഡിപ്പിച്ച യുവാവിനെതിരെ കേസെടുത്തു.കുറ്റ്യാടി അടുക്കത്ത് സ്വദേശി അജ്നാസിനെതിയാണ് പൊലീസ് കേസെടുത്തത്. ലഹരി നൽകിയ ശേഷം നിരവധി തവണ ഇയാൾ പീഡനത്തിരയാക്കിയെന്നും തന്റെ സുഹൃത്തുക്കൾ ഇരയാക്കപ്പെട്ടുവെന്നും കുട്ടി പറഞ്ഞു.
കുറ്റ്യാടി സ്വദേശിയായ പ്രായപൂർത്തിയാകാത്ത കുട്ടിയുടെ പരാതിയിലാണ് പൊലീസ് കേസെടുത്തത്. വീട്ടുകാർ ഉറങ്ങിയ ശേഷം തന്നെ ഫോണിൽ വിളിച്ച് വീട്ടിൽ നിന്നും പുറത്തിങ്ങാൻ ആവശ്യപ്പെടും. ശേഷം കാറുമായി അജ്നാസിൻറെ വീട്ടിലേക്ക് കൊണ്ടൂ പോകും. അവിടെ വെച്ചാണ് ലഹരി ഉപയോഗിക്കാൻ നിർബന്ധിക്കുന്നത്. ലഹരി നൽകിയ ശേഷമാണ് ലൈംഗികമായി പീഢിപ്പിക്കുന്നതെന്നും കുട്ടി പറയുന്നു.
ബെക്കാം എന്ന പേരിലുള്ള ബാർബർ ഷോപ്പ് നടത്തുന്ന അജ്നാസിൽ നിന്നും സമാന അനുഭവങ്ങൾ ഉണ്ടായതായി മറ്റൊരു പത്തൊമ്പതുകാരനും പറയുന്നു. പ്രതിയെ പിടികൂടാനുള്ള ശ്രമത്തിലാണെന്നും ചോദ്യം ചെയ്യലിന് ശേഷം കൂടുതൽ അന്വേഷണത്തിലേക്ക് കടക്കുമെന്നും പൊലീസ് പറഞ്ഞു.

കുറ്റ്യാടിയിൽ മയക്കുമരുന്ന് നൽകി കുട്ടികളെ പ്രകൃതിവിരുദ്ധ പീഡനത്തിന് ഇരയാക്കിയതായി പരാതി; യുവാവിനെതിരെ കേസ്

Kuttiadi

ന്യൂഡൽഹി: രാജ്യത്ത് കോവിഡ് കേസുകൾ വർധിക്കുന്നതായി റിപ്പോർട്ട്. കോവിഡ് വ്യാപനത്തിന്റെ പശ്ചാത്തലത്തിൽ പ്രതിരോധ പ്രവർത്തനങ്ങളുടെ ഭാഗമായി മോക്ക് ഡ്രില്ലുകൾ നടത്താൻ കേന്ദ്ര ആരോഗ്യമന്ത്രാലയം സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും നിർദേശം നൽകി.
ആരോഗ്യ അടിയന്തരാവസ്ഥ നേരിടാൻ ആശുപത്രികളിലെ സജ്ജീകരണങ്ങൾ സജ്ജമാണെന്നു വിലയിരുത്തുന്ന മോക്ക് ഡ്രിൽ വ്യാഴാഴ്ച നടത്താനാണ് നിർദേശം നൽകിയിരിക്കുന്നത്. അതേസമയം ആശുപത്രികളിൽ ഓക്സിജൻ, കിടക്കകൾ, വെൻ്റിലേറ്ററുകൾ എന്നിവയുടെ ലഭ്യത ഉറപ്പാക്കണമെന്ന് സംസ്ഥാനങ്ങൾക്ക് നിർദേശം നൽകിയിട്ടുണ്ട്. തീവ്രത കുറഞ്ഞ വകഭേദമായതിനാൽ ആശങ്കവേണ്ടെന്നും ആരോഗ്യമന്ത്രാലയം വ്യക്തമാക്കുന്നുണ്ട്.
24 മണിക്കൂറിനിടെ രാജ്യത്ത് 4866 കോവിഡ് കേസുകളാണ് റിപ്പോർട്ട് ചെയ്തിരിക്കുന്നത്. അതിൽ കേരളത്തിൽ 114 പുതിയ കോവിഡ് രോഗികളുമുണ്ട്. ഇതോടെ കേരളത്തിലെ ആകെ ആക്ടീവ് കേസുകൾ 1487 ആയി ഉയർന്നു. ഏഴ് മരണവും റിപ്പോർട്ട് ചെയ്തിട്ടുണ്ട്. കോവിഡ് കേ​സു​ക​ൾ ഉ​യ​രു​ന്ന സാ​ഹ​ച​ര്യ​ത്തി​ൽ എ​ല്ലാ സം​സ്ഥാ​ന​ങ്ങ​ളും സ​ജ്ജ​മാ​ക​ണ​മെ​ന്നാണ് കേ​ന്ദ്ര സ​ർ​ക്കാ​റി​ന്റെ നി​ർ​ദേ​ശം.ഓ​ക്സി​ജ​ൻ ല​ഭ്യ​ത​ക്ക് പു​റ​മെ, രോ​ഗി​ക​ളെ സ​മ്പ​ർ​ക്ക​ വി​ല​ക്കി​ൽ ചി​കി​ത്സി​ക്കാ​നു​ള്ള കി​ട​ക്ക​ക​ൾ, വെ​ന്റി​ലേ​റ്റ​റു​ക​ൾ, അ​വ​ശ്യ മ​രു​ന്നു​ക​ൾ എ​ന്നി​വ ക​രു​ത​ണ​മെ​ന്നും ബ​ന്ധ​പ്പെ​ട്ട വ​കു​പ്പു​ക​ൾ ആ​വ​ശ്യ​പ്പെ​ട്ടു.&nbsp;

രാജ്യത്ത് കോവിഡ് കേസുകൾ വർധിക്കുന്നതായി റിപ്പോർട്ട്;പ്രതിരോധ പ്രവർത്തനങ്ങളുടെ ഭാഗമായി മോക്ക് ഡ്രില്ലുകൾ നടത്തും

National

മലയാളികളുടെ വികാരമാണ് ചായ. ദിവസവും ഒരു കപ്പ് ചായയുമായിട്ടാണ് മിക്കവരുടെയും ദിവസം തുടങ്ങുന്നത്. ചായ കുടിച്ചില്ലെങ്കിലോ ചായ മോശമായാലോ ആ ദിവസം തന്നെ പോയിയെന്നാണ്. ചിലർ കട്ടൻ ചായയാണ് കൂടുതലായി കുടിക്കുന്നത്. എന്നാൽ പലരും ചായ ഉണ്ടാക്കുന്ന രീതി വളരെ വ്യത്യസ്തമാണ്. പക്ഷേ ചായ ഉണ്ടാക്കുമ്പോൾ ചില കാര്യങ്ങൾ ശ്രദ്ധിക്കണം.
പലരും തെറ്റായ രീതിയിലാണ് ചായ ഉണ്ടാക്കുന്നത്. നന്നായി വെട്ടിത്തിളച്ച വെള്ളത്തിൽ തേയിലപ്പൊടിയും പാലും ഒഴിച്ചാണ് പൊതുവെ എല്ലാവരും ചായ ഉണ്ടാക്കുന്നത്. എന്നാൽ ഈ രീതി തെറ്റാണ്. തേയിലപ്പൊടിയും കാപ്പിപ്പാെടിയും ഗുണം നൽകണമെങ്കിൽ 85-90 ഡിഗ്രി തിളച്ച വെള്ളം മതിയാകും. ഫിൽട്ടർ ചെയ്ത വെള്ളമായിരിക്കും ചായ ഉണ്ടാക്കാൻ നല്ലത്. അപ്പോൾ അമിതമായി തിളപ്പിക്കേണ്ടിവരുന്നില്ല.
ശരിയായി ചായയുണ്ടാക്കുന്ന രീതി
വെള്ളം ചെറുതായി തിളച്ച് ആവി വരുമ്പോൾ തീ ഓഫ് ചെയ്യുക. പിന്നീട് 30 സെക്കന്റ് കഴിഞ്ഞ് അതിലേക്ക് തേയിപ്പൊടിയോ കാപ്പിപ്പൊടിയോ ചേർക്കാം. ഇത് അടച്ച് വച്ച് മൂന്ന് - നാല് മിനിട്ട് കഴിഞ്ഞ ശേഷം അരിച്ചെടുക്കാവുന്നതാണ്. എന്നിട്ട് കുടിക്കാം. പാൽ ചേർത്ത ചായയിലും ഇതേ രീതി തുടരുക. ഒരിക്കലും തിളച്ചുകൊണ്ടിരിക്കുന്ന പാലിൽ തേയിലപ്പൊടി ഇടരുത്. പകരം പാൽ തിളച്ചശേഷം ഓഫ് ചെയ്ത് ഒരു 30 സെക്കന്റ് കഴിഞ്ഞ് തേയില ഇടണം എന്നിട്ട് മൂന്ന് മിനിട്ട് കഴിഞ്ഞ് അരിച്ചെടുത്താൽ മതി. തേയിലപ്പൊടിയ്ക്ക് ഒപ്പം പഞ്ചസാര ചേർത്ത് തിളപ്പിച്ചാൽ ആന്റിഓക്‌സിഡന്റുകളുടെ ഗുണം നഷ്ടമാകുന്നു.

വെള്ളം തിളച്ചാലുടൻ തേയില ഇടാറുണ്ടോ? എങ്കിൽ ഇക്കാര്യങ്ങൾ അറിയണം

Health

തിരുവനന്തപുരം: ബലിപെരുന്നാൾ അവധി മറ്റന്നാൾ മാത്രം. നാളത്തെ അവധിയാണ് മറ്റന്നാളത്തേക്ക് മാറ്റി സർക്കാർ ഉത്തരവിട്ടത്. രണ്ട് ദിവസവും അവധി വേണമെന്ന ആവശ്യം നേരത്തെ ഉയ‌ർന്നിരുന്നു. ബക്രീദിന് വെള്ളിയാഴ്ച അവധി പ്രഖ്യാപിച്ചിട്ടുണ്ടെങ്കിലും മാസപ്പിറവി വൈകിയതിനാൽ ജൂൺ 7നാവും വലിയപെരുന്നാളെന്നാണ് മതപണ്ഡിതർ അറിയിച്ചിരുന്നത്.

ബക്രീദ്; നാളത്തെ അവധി മറ്റന്നാളത്തേക്ക് മാറ്റി

നിലമ്പൂര്‍: ഉപതിരഞ്ഞെടുപ്പില്‍ നാമനിര്‍ദേശ പത്രിക പിൻവലിക്കാനുള്ള അവസാനദിവസവും യുഡിഎഫിന് മുന്നില്‍ പുതിയ ഉപാധികള്‍വെച്ച് പി.വി. അന്‍വര്‍. അടുത്തതവണ യുഡിഎഫിന് ഭരണം കിട്ടിയാല്‍ മന്ത്രിയാക്കണമെന്നും ആഭ്യന്തരവകുപ്പും വനംവകുപ്പും നല്‍കണമെന്നും അല്ലെങ്കില്‍ വി.ഡി. സതീശനെ യുഡിഎഫിന്റെ നേതൃസ്ഥാനത്തുനിന്ന് മാറ്റിയാല്‍ മതിയെന്നുമാണ് പി.വി. അന്‍വറിന്റെ ഉപാധി. ഇത് രണ്ടും അംഗീകരിച്ചാല്‍ യുഡിഎഫിന്റെ മുന്നണിപടയാളിയായി താന്‍ രംഗത്തുണ്ടാകുമെന്നും അൻവർ പറയുന്നു.വി.ഡി. സതീശനെ 'മുക്കാല്‍ പിണറായി' എന്നാണ് മാധ്യമങ്ങളോട് സംസാരിക്കുന്നതിനിടെ പി.വി. അന്‍വര്‍ വിശേഷിപ്പിച്ചത്. മലപ്പുറം ജില്ല വിഭജിക്കണമെന്നും അദ്ദേഹം ആവശ്യപ്പെട്ടു.
''വി.ഡി. സതീശനെ യുഡിഎഫ് നേതൃസ്ഥാനത്ത് ഇരുത്തിക്കൊണ്ട് ഞാന്‍ അതിലേക്ക് വരില്ല. ഒരു പിണറായിയെ ഇറക്കിയിട്ട് മുക്കാല്‍ പിണറായിയെ ഭരണത്തില്‍ കയറ്റാന്‍ ഞാനില്ല. 2026ലെ തിരഞ്ഞെടുപ്പില്‍ ആഭ്യന്തരവകുപ്പും വനംവകുപ്പും തരാന്‍ തയ്യാറാണെന്ന് രേഖയാക്കി പരസ്യമായി പറയുകയാണെങ്കില്‍ 2026-ല്‍ യുഡിഎഫിനെ അധികാരത്തിലെത്തിക്കാനുള്ള മുന്നണിപടയാളിയായി ഞാന്‍ ഉണ്ടാകും. ഒരു വലിയ പിണറായിയെ ഇറക്കിയിരുത്തിയിട്ട് കേരളത്തില്‍ ഒരു മുക്കാല്‍ പിണറായിയെ കയറ്റി ഇരുത്തി മുഖ്യമന്ത്രിയാക്കാനാണല്ലോ നടക്കുന്നത്. അതിന് പിവി അന്‍വര്‍ ഇല്ലെന്നാണ് പറയുന്നത്. അതില്ലാത്ത യുഡിഎഫില്‍ പിവി അന്‍വര്‍ ഉണ്ടാകും, ഒരു തര്‍ക്കവുമില്ല'', അദ്ദേഹം പറഞ്ഞു.മലപ്പുറം ജില്ല വിഭജിക്കണമെന്നതാണ് തന്റെയും പാര്‍ട്ടിയായ തൃണമൂല്‍ കോണ്‍ഗ്രസിന്റെയും ആവശ്യമെന്നും പി.വി. അന്‍വര്‍ വ്യക്തമാക്കി. മലപ്പുറം ജില്ല വിഭജിക്കണം. തിരഞ്ഞെടുപ്പിന് ശേഷവും തൃണമൂല്‍ ഈ വിഷയം ഉന്നയിച്ച് രംഗത്തുണ്ടാവും. മലയോര ജനതയ്ക്കായി തിരുവമ്പാടി കൂടി ഉള്‍പ്പെടുത്തി പുതിയ ജില്ല വേണമെന്നാണ് ആവശ്യമെന്നും പി.വി. അന്‍വര്‍ പറഞ്ഞു.

സതീശനെ മാറ്റണം,അടുത്തതവണ യുഡിഎഫിന് ഭരണം കിട്ടിയാല്‍ മന്ത്രിയാക്കണം;ഉപാധികള്‍വെച്ച് പി.വി. അന്‍വർ

മണിയൂർ: ലോക പരിസ്ഥിതി ദിന പരിപാടിയുടെ ഭാഗമായി കെ.പി.ഷാജി ഗ്രന്ഥാലയം വെട്ടിൽ പീടികയുടെ നേതൃത്വത്തിൽ കുറുന്തോടി എം എൽ പി സ്കൂളിൽ വൃക്ഷതൈ നട്ടു കൊണ്ട് മണിയൂർ ഗ്രാമപഞ്ചായത്ത് പൊതുമരാമത്ത് സ്റ്റാൻൻ്റിംഗ് കമ്മിറ്റി ചെയർമാൻ കെ.ശശിധരൻ ഉദ്ഘാടനം നിർവ്വഹിച്ചു. ഗ്രന്ഥാലയം പ്രസിഡണ്ട് വി.കെ.കരുണാകരൻ അധ്യക്ഷത വഹിച്ചു. സ്കൂൾ പ്രധാന അധ്യാപിക പ്രസീന, മാനേജർ കെ.ചന്ദ്രിക , ഇ.സി.രാഘവൻ എന്നിവർ സംസാരിച്ചു. കെ.കെ.പ്രദീപൻ സ്വാഗതവും വി.കെ. റീബ നന്ദിയും പറഞ്ഞു.

പരിസ്ഥിതി ദിനാചരണം

വടകര: മുന്‍ മന്ത്രി സി.കെ.നാണുവിന്റെ ഭാര്യ പി.മാലതി (80) നിര്യാതയായി. രാവിലെ കോഴിക്കോട് സ്വകാര്യ ആശുപത്രിയിലാണ് അന്ത്യം. പരേതരായ പുന്നോളത്തില്‍ കണ്ണന്റെയും (ഇയ്യങ്കോട്) ചിരുതയുടെയും മകളാണ്. മക്കള്‍: സി.കെ.സുധീര്‍ കുമാര്‍, ഡോ.സി.കെ.സുശാന്ത്, പരേതയായ സുജിത. മരുമക്കള്‍: സ്മിത സുധീര്‍, ഡോ ബിബിന സുശാന്ത്. സഹോദരങ്ങള്‍: പരേതനായ പി കുമാരന്‍ (റിട്ട പഞ്ചായത്ത് എക്യൂട്ടീവ് ഓഫീസര്‍ നാദാപുരം), കല്യാണി (വാണിമേല്‍), പി നാണു (കക്കട്ടില്‍), ഇയങ്കോട് കുഞ്ഞിരാമന്‍, വാസു (നാദാപുരം), ജാനു.

മുന്‍ മന്ത്രി സി.കെ.നാണുവിന്റെ ഭാര്യ പി.മാലതി നിര്യാതയായി

Obituary

പൂച്ചാക്കൽ (ആലപ്പുഴ): ടൂറിസ്റ്റ് ബസ് ബൈക്കിൽ ഇടിച്ച് ബൈക്ക് യാത്രക്കാരനായ യുവാവ് മരിച്ചു. അരൂക്കുറ്റി പഞ്ചായത്ത് ഒൻപതാം വാർഡിൽ നദ്‌വത്ത് നഗർ കൊട്ടാരത്തിൽ പരേതനായ നകുലൻ്റെ മകൻ കെ.എൻ. രാഹുൽ (24) ആണ് മരിച്ചത്. ചേർത്തല-അരൂക്കുറ്റി റോഡിൽ കണ്ണാട്ട് കലുങ്കിന് തെക്കുഭാഗത്ത് വ്യാഴാഴ്ച വെളുപ്പിന് മൂന്നിനാണ് അപകടമുണ്ടായത്.
അപകടത്തിൽപ്പെട്ട രാഹുലിനെ പൂച്ചാക്കൽ പോലീസ് തുറവൂർ താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. കളമശ്ശേരിയിലെ ഷിപ്പിങ് കമ്പനിയിലെ ജീവനക്കാരനാണ് രാഹുൽ. മാതാവ്: ലതിക. സഹോദരൻ: അഖിൽ.

ടൂറിസ്റ്റ് ബസ് ഇടിച്ച് ബൈക്ക് യാത്രക്കാരനായ യുവാവ് മരിച്ചു

തിരുവനന്തപുരം: രാജ്ഭവനിലെ പരിസ്ഥിതി ദിനാഘോഷ പരിപാടി ബഹിഷ്‌കരിച്ച് കൃഷിമന്ത്രി പി. പ്രസാദ്. പരിപാടി നടക്കുന്ന വേദിയിലെ കാവിക്കൊടിയേന്തി നില്‍ക്കുന്ന ഭാരതാംബയുടെ ചിത്രത്തെച്ചൊല്ലിയാണ് ഭിന്നതയുണ്ടായത്. രാജ്ഭവനിലെ വേദിയില്‍ ആര്‍എസ്എസ് പരിപാടികളിൽ ഉപയോഗിക്കുന്ന ചിത്രമുണ്ടെന്ന് ചൂണ്ടിക്കാണിച്ചാണ് മന്ത്രി പരിപാടിയില്‍നിന്ന് വിട്ടുനിന്നത്.
സംസ്ഥാന സര്‍ക്കാരിന്റെ പരിസ്ഥിതി ദിനാഘോഷം രാജ്ഭവനില്‍വെച്ച് ഗവര്‍ണര്‍ രാജേന്ദ്ര ആര്‍ലേക്കറും കൃഷിമന്ത്രി പി. പ്രസാദും സംയുക്തമായി ഉദ്ഘാടനം ചെയ്യാനായിരുന്നു നിശ്ചയിച്ചിരുന്നത്. ഇതിനുപിന്നാലെ വേദിയിലെ ചിത്രത്തെക്കുറിച്ചുള്ള അതൃപ്തി രാജ്ഭവന്‍ അധികൃതരെ കൃഷിവകുപ്പ് അറിയിക്കുകയായിരുന്നു.രാജ്ഭവന്റെ സെന്‍ട്രല്‍ ഹാളിലെ ഈ ചിത്രം നേരത്തെതന്നെ വെച്ചതാണെന്നും മുന്‍പ് പല പരിപാടികളും ഈ പശ്ചാത്തലത്തില്‍ നടന്നതാണെന്നും അതിനാല്‍ ചിത്രം നീക്കാനാകില്ലെന്നുമുള്ള നിലപാട് ഗവര്‍ണര്‍ സ്വീകരിച്ചു. ഇതോടെ മന്ത്രി പരിപാടി ബഹിഷ്‌കരിക്കുകയായിരുന്നു.

വേദിയിൽ കാവിക്കൊടിയേന്തിയ ഭാരതാംബയുടെ ചിത്രം; രാജ്ഭവനിലെ പരിസ്ഥിതി ദിനാഘോഷ പരിപാടി ബഹിഷ്‌കരിച്ച് മന്ത്രി പി. പ്രസാദ്

വൈക്കിലശ്ശേരി: കെ എസ് എസ് പി യു കുരിക്കിലാട് യൂണിറ്റിന്റെ ആഭിമുഖ്യത്തിൽ വൈക്കിലശ്ശേരി യു പി സ്കൂൾ ഗ്രൗണ്ടിൽ വൃക്ഷ തൈ നട്ടുകൊണ്ട് പരിസ്ഥിതി ദിനം ആചരിച്ചു. കെ എസ് എസ് പി യു യൂണിറ്റ് പ്രസിഡന്റ് എം സി ബാലകൃഷ്ണൻ, വൈക്കിലശ്ശേരി യു പി സ്കൂൾ സീനിയർ അധ്യാപിക ആയിഷ എന്നിവർ സംയുക്തമായി ഉദ്ഘാടനം നിർവ്വഹിച്ചു. ബാലകൃഷ്ണൻ അരുണിമ, സുരേന്ദ്രൻ, എസ്.രാധാകൃഷ്ണൻ, അനൂപ് എന്നിവർ സംസാരിച്ചു. സെക്രട്ടറി പി.സുരേഷ് സ്വാഗതവും അഷ്‌കർ നന്ദിയും പറഞ്ഞു. മരം സംരക്ഷിച്ചു കൊള്ളാമെന്ന് വിദ്യാർഥികൾ പ്രതിജ്ഞ എടുത്തു.

പരിസ്ഥിതി ദിനം ആചരിച്ചു

ആയഞ്ചേരി: ഗ്രാമ പഞ്ചായത്ത് നടത്തിയ അശാസ്ത്രീയമായ റോഡ് നിർമ്മാണത്തിൻ്റെ ഭാഗമായി പി ഡബ്ള്യു ഡി റോഡിൽ വെള്ളം കെട്ടി നിൽക്കുന്ന അവസ്ഥയ്ക്ക് രണ്ട് ആഴ്ചകൾ പിന്നിട്ടിട്ടും പരിഹാരം കാണാൻ കഴിയാത്ത സാഹചര്യത്തിൽ പ്രത്യേക ഭരണ സമിതി യോഗം വിളിച്ച് ചേർക്കണമെന്ന് എൽ ഡി എഫ് മെമ്പർമാർ പ്രസിഡണ്ടിന് നൽകിയ കത്തിൽ ആവശ്യപ്പെട്ടു.&nbsp;
കടമേരി റോഡിൽ പഞ്ചായത്ത് ഓഫീസിന് മുമ്പിൽ മഴ തുടങ്ങിയത് മുതൽ വെള്ളക്കെട്ടാണ്. വാഹന ഗതാഗതം തടസ്സപ്പെടുന്നു. ഇരു ചക്ര വാഹനങ്ങളിൽ പോവുന്നവർ വെള്ളത്തിൽ വീണ് അപകടം പറ്റുന്നത് നിത്യ സംഭവമാവുന്നു. വെള്ളത്തിലൂടെ കടന്ന് പോവുന്ന വാഹനങ്ങൾക്ക് കേടുപാടുകൾ സംഭവിച്ച് സാമ്പത്തിക നഷ്ടമുണ്ടാവുന്നു. രണ്ടാഴ്ച കഴിഞ്ഞിട്ടും ഒരു പരിഹാരവും കാണാത്തത് ജനങ്ങളോടുള്ള വെല്ലുവിളിയാണെന്ന് എൽഡിഎഫ് മെമ്പർമാർ ആരോപിച്ചു.
പഞ്ചായത്ത് രാജ് നിയമം 161 ൽ 1 (എ )വകുപ്പ് പ്രകാരം ഒരു പ്രത്യേക ആവശ്യമുന്നയിച്ച് ഭരണസമിതി അംഗങ്ങളിൽ മൂന്നിൽ ഒരു ഭാഗം കത്ത് നൽകിയാൽ പ്രത്യേക ഭരണ സമിതി യോഗം വിളിച്ച് ചേർക്കണമെന്ന നിയമപ്രകാരമാണ് എൽ ഡി എഫ് മെമ്പർമാർ പ്രസിഡണ്ടിന് കത്ത് നൽകിയത്. പഞ്ചായത്ത് സ്റ്റാൻ്റിഗ് കമ്മിറ്റി ചെയർമാൻ ടി.വി. കുഞ്ഞിരാമൻ, മെമ്പർമാരായ ശ്രീലത എൻ പി , സുധസുരേഷ് ,പ്രബിത അണിയോത്ത്, ടി സജിത്ത്, പി രവീന്ദ്രൻ, ലിസ പുനയംകോട്ട് എന്നിവരാണ് നോട്ടിസ് നൽകിയത്.

ആയഞ്ചേരി പഞ്ചായത്ത് ഓഫീസിന് മുന്നിലെ വെള്ളക്കെട്ട്; പ്രത്യേക ഭരണ സമിതി യോഗം വിളിക്കണമെന്ന് എൽ ഡി എഫ്

ആയഞ്ചേരി: വർദ്ധിച്ചുവരുന്ന രാസലഹരി ഉപയോഗത്തിനെതിരെ ജില്ലയിലെ 20 ലക്ഷം ജനങ്ങളെ അണിനിരത്തി, അന്താരാഷ്ട്ര ലഹരി വിരുദ്ധദിനമായ ജൂൺ 26ന് 2 Million Pledge എന്ന പേരിൽ നടത്തുന്ന ലഹരി വിരുദ്ധ ക്യാമ്പയിൻ വിജയിപ്പിക്കുന്നതിൻ്റെ ഭാഗമായ് 12-ാം വാർഡിൽ സംഘാടക സമിതി രൂപീകരിച്ചു. കടമേരി എൽ പി സ്കൂളിൽ ചേർന്ന സംഘാടക സമിതി രൂപീകരണ യോഗം സ്റ്റാൻ്റിഗ് കമ്മിറ്റി ചെയർമാൻ ടി.വി. കുഞ്ഞിരാമൻ ഉൽഘാടനം ചെയ്തു. കെ മോഹനൻ അധ്യക്ഷം വഹിച്ചു.&nbsp;
ഹെൽത്ത് ഇൻസ്പെക്ടർ സിദ്ധീഖ് കെ, പ്രധാന അധ്യാപിക ആശ, സി.ഡി എസ്സ് അംഗം നിഷ.പി, ഇ.കെ ബാലൻ, ബിജില തുണ്ടിയിൽ, സനില എൻ.കെ, മല്ലിക ജി.കെ, ഷിജിന , ഷീജ കെ എന്നിവർ സംസാരിച്ചു. സ്കൂൾ, അംഗൻവാടി, സ്ഥാപനങ്ങൾ, കുടുംബശ്രീ അയൽകൂട്ടങ്ങൾ എന്നിവിടങ്ങളിൽ പ്രതിജ്ഞ എടുക്കുന്നതിനും, മാക്കം മുക്ക് ബസ്സ് സ്റ്റോപ്പിന് സമീപം കേന്ദ്രീകരിച്ച് ജനകീയപ്രതിജ്ഞ എടുക്കാനും തീരുമാനിച്ചു. ടി.വി. കുഞ്ഞിരാമൻ ചെയർമാനും, കെ. മോഹനൻ കൺവീനറുമായ് 51 അംഗ സംഘാടക സമിതി രൂപീകരിച്ചു.

സംഘാടക സമിതി രൂപീകരിച്ചു

Inshort

വരിക്കോളി: കക്കട്ടിലെ ദുർഗ്ഗ പ്രസ് ഉടമയും എൽ.ഐ.സി. എജന്റും പരദേവതാ ക്ഷേത്ര കമ്മറ്റി പ്രസിഡൻ്റും പൊതുപ്രവർത്തകനുമായ വരിക്കോളി പൊന്നങ്കോട്ട് വിജയൻ (66) അന്തരിച്ചു. ഭാര്യ: ഗിരിജ (മുൻ നാദാപുരം ഗ്രാമ പഞ്ചായത്ത് മെമ്പർ , ആർ.ഡി. എജന്റ് ). മക്കൾ. രാകേന്ദു (ബാംഗ്ലൂർ), വൈശാഖ് (മലബാർ ഗോൾഡ്).

വരിക്കോളി പൊന്നങ്കോട്ട് വിജയൻ അന്തരിച്ചു

കൊച്ചി: 'മഞ്ഞുമ്മല്‍ ബോയ്‌സ്' സിനിമയുമായി ബന്ധപ്പെട്ട സാമ്പത്തിക തട്ടിപ്പ് കേസില്‍ നിര്‍മാതാക്കള്‍ക്ക് പോലീസിന്റെ നോട്ടീസ്. രണ്ടാഴ്ചയ്ക്കുള്ളില്‍ അന്വേഷണ സംഘത്തിന് മുമ്പില്‍ ഹാജരാവാന്‍ നിര്‍മാതാക്കളായ സൗബിന്‍ ഷാഹിര്‍, ബാബു ഷാഹിര്‍, ഷോണ്‍ ആന്റണി നോട്ടീസില്‍ ആവശ്യപ്പെടുന്നു. നേരത്തെ, കേസ് റദ്ദാക്കണമെന്ന നിര്‍മാതാക്കളുടെ ആവശ്യം ഹൈക്കോടതി തള്ളിയിരുന്നു.
അന്വേഷണം തുടരാമെന്ന ഹൈക്കോടതി വ്യക്തമാക്കിയ പശ്ചാത്തലത്തിലാണ് പോലീസ് നോട്ടീസ് അയച്ചിരിക്കുന്നത്. ലാഭവിഹിതം നല്‍കിയില്ലെന്ന മരട് സ്വദേശിയുടെ പരാതിയിലാണ് പോലീസ് കേസെടുത്തത്. സിറാജ് വലിയതുറയാണ് പരാതിക്കാരന്‍. സിനിമയുടെ നിര്‍മാണത്തിനായി പലഘട്ടങ്ങളിലായി ഏഴുകോടി രൂപ തന്റെ കൈയില്‍നിന്ന് വാങ്ങിയെന്നും ലാഭവിഹിതം നല്‍കാതെ വിശ്വാസവഞ്ചനകാണിച്ചുവെന്നുമാണ് പരാതി.വാഗ്ദാനം നല്‍കിയ പണം കൃത്യസമയത്ത് നല്‍കിയില്ലെന്നാണ് പ്രതിയാക്കപ്പെട്ട നിര്‍മാതാക്കളുടെ വാദം.

'മഞ്ഞുമ്മല്‍ ബോയ്‌സ്' സാമ്പത്തിക തട്ടിപ്പ് കേസ്; സൗബിന്‍ ഷാഹിറിന് നോട്ടീസ്

പയ്യോളി: അനുദിനം പെരുകിക്കൊണ്ടിരിക്കുന്ന രാസ ലഹരിക്കെതിരെ ആഞ്ഞടിക്കാനുള്ള തയ്യാറെടുപ്പിലാണ് പയ്യോളിയിൽ പുതുതായി രൂപം കൊണ്ട പട എന്ന പോരാട്ട വേദി. മുനിസിപ്പാലിറ്റിയുടെ മുക്കിലും മൂലയിലും പ്രചരണം നടത്താനും, നാട്ടിലെ ഓരോ പൗരനെയും ഇതിൻറെ കണ്ണിയാക്കാനും ഉള്ള പ്രവർത്തനങ്ങൾ നടക്കുന്നു. വിവിധ സബ് കമ്മിറ്റികളും, സ്കോർഡുകളും, യൂത്ത്, വനിതാ വേദികളും രൂപീകൃതമായിട്ടുണ്ട്.&nbsp;
പയ്യോളി ഐ.പി.സി ഹാളിൽ നടന്ന സംഘാടകസമിതി യോഗത്തിൽ റാണാ പ്രതാപ് കെ.പി.(ചെയർമാൻ), രമേശൻ കൊക്കാലേരി (കൺവീനർ), കൗൺസിലർ സുനൈദ് എ.സി (ട്രഷറർ) എന്നിവർ പങ്കെടുത്തു. വിവിധ ഭാഗങ്ങളിൽ നിന്നുള്ള നാല്പതോളം എക്സിക്യൂട്ടീവ് അംഗങ്ങളും പങ്കാളികളായി. ആദ്യപടി എന്ന നിലയ്ക്ക് ടൗണിന്റെ വിവിധ ഭാഗങ്ങളിൽ രാത്രി 10 മണിക്ക് ശേഷം യൂത്ത് വിംഗ് ലഹരി കേന്ദ്രങ്ങൾ കണ്ടെത്താനുള്ള പ്രവർത്തനങ്ങളും നടത്തി.

ലഹരിക്കെതിരെ 'പട'

കോട്ടയം: രാമപുരത്തിന് സമീപം ചൂരപേട്ട വളവില്‍ കാര്‍ നിയന്ത്രണംവിട്ട് പാറയില്‍ ഇടിച്ച് യുവതി മരിച്ചു. തെള്ളകം സ്വദേശി ജോസ്‌നയാണ് മരിച്ചത്. കാറിലുണ്ടായിരുന്ന സുഹൃത്ത് നീതുവിന് പരിക്കേറ്റു. ബുധനാഴ്ച വൈകീട്ട് ആറരയോടെയായിരുന്നു അപകടം.
കാര്‍ ഓടിച്ചിരുന്ന വേളൂര്‍ സ്വദേശി രഞ്ജിത്ത്, കാണക്കാരി സ്വദേശി ജോജോ എന്നിവര്‍ പരിക്കേല്‍ക്കാതെ രക്ഷപ്പെട്ടു. മെഡിക്കല്‍ റെപ്രസന്റേറ്റീവായി ജോലി ചെയ്യുന്ന സംഘം തൊടുപുഴയില്‍നിന്നും ഏറ്റുമാനൂര്‍ ഭാഗത്തേക്ക് വരികയായിരുന്നു. രാമപുരം പോലീസ് മേല്‍നടപടികള്‍ സ്വീകരിച്ചു.

കോട്ടയത്ത് കാര്‍ നിയന്ത്രണംവിട്ട് പാറയിലിടിച്ചു; യുവതിക്ക് ദാരുണാന്ത്യം

വടകര: നടക്കുതാഴ-ചോറോട് കനാലിൽ വൈക്കിലശ്ശേരി ഇല്ലത്ത് താഴ പാലത്തിന് സമീപം മീനുകൾ ചത്ത് പൊങ്ങി. കനാലിലെ വെള്ളം നിറം മാറുകയും ചെയ്തു. സംഭവം പ്രദേശവാസികളുടെ ശ്രദ്ധയിൽപ്പെട്ടതിനെ തുടർന്ന് ഗ്രാമ പഞ്ചായത്ത് വൈസ് പ്രസിഡണ്ട് രേവതി പെരുവാണ്ടിയിൽ സ്ഥലത്തെത്തി. ആരോഗ്യ സ്റ്റാന്റിങ്ങ് കമ്മിറ്റി ചെയർമാൻ സി.നാരായണൻ, ഹെൽത്ത് ഇൻസ്പെക്ടർ ഷീബ കെ.ടി.കെ, ഗ്രാമ പഞ്ചായത്ത് എച്ച് ഐ ലിൻഷി, ജെഎച്ച് ഐ രാമചന്ദ്രൻ, നാട്ടുകാരായ എ എം രാജീവൻ, ഏ.കെ.വിജയൻ, കെ.രാജീവൻ എന്നിവർ ചേർന്ന് നടക്കുതാഴ മുതൽ ഇല്ലത്ത് താഴ വരെ പരിശോധന നടത്തി. നാളോം വയൽ മുതൽ വെള്ളത്തിന് കറുപ്പ് നിറമാണുള്ളത്.&nbsp;
നാളോം വയൽ ഭാഗത്ത് കനാൽ തീരങ്ങളിൽ പുല്ല് അഴുകി കറുപ്പ്നിറത്തിലുളള വെള്ളമുണ്ട്. ആരോഗ്യ വകുപ്പ് അധികൃതർ വെള്ളം ശേഖരിച്ച് പരിശോധനക്ക് അയച്ചു. കനാലിലെ വെള്ളത്തിൽ മാലിന്യമോ രാസവസ്തുക്കളോ ചേർന്നിട്ടുണ്ടോ എന്ന് ജനങ്ങൾ സംശയം ഉന്നയിച്ചതിനെ തുടർന്ന് ഗ്രാമ പഞ്ചായത്ത് പ്രസിഡണ്ട് പി.പി.ചന്ദ്രശേഖരന്റെ നേതൃത്വത്തിൽ മാലിന്യമുക്തം നവകേരള മിഷൻ ജില്ലാ കോ-ഓഡിനേറ്റർ മണലിൽ മോഹനൻ സ്ഥലത്തെത്തി കനാലിലെ വെള്ളo സാമ്പിൾ എടുത്തു പരിശോധനയ്ക്ക് കൊണ്ടുപോയി. ഇവർക്കൊപ്പം വൈസ് പ്രസിഡണ്ട് രേവതി പെരുവാണ്ടിയിൽ, വികസന കാര്യ സ്റ്റാന്റിങ്ങ് കമ്മിറ്റി ചെയർമാൻ കെ.മധുസൂദനൻ, പഞ്ചായത്ത്ആംഗം പ്രസാദ് വിലങ്ങിൽ, നാട്ടുകാരായ കെ. രാജീവൻ, ശശി ഡ്രീംസ് എന്നിവരും ഉണ്ടായിരുന്നു.&nbsp;&nbsp;

നടക്കുതാഴ- ചോറോട് കനാലിലെ മീനുകൾ ചത്തുപൊന്തി; വെള്ളം പരിശോധനയ്ക്കയച്ചു

അരീക്കോട് (മലപ്പുറം): ചാലിയാറിന്റെ പോഷകനദി പൂങ്കുടിപ്പുഴയില്‍ കാണാതായ വിദ്യാര്‍ഥിയെ മരിച്ചനിലയില്‍ കണ്ടെത്തി. തിങ്കളാഴ്ച വൈകുന്നേരം അഞ്ചുമണിയോടെയാണ് കാട്ടുമണ്ണില്‍ കടവില്‍ മരതക്കോടന്‍ ഹിദായത്തിന്റെ മകന്‍ അന്‍ഷിഫിനെ (12) കാണാതായത്. വെട്ടുപാറ വാവൂര്‍ കെഎംഎച്ച്എംയുപി സ്‌കൂളില്‍ ഏഴാംതരം വിദ്യാര്‍ഥിയായ അന്‍ഷിഫ് ഈ അധ്യയനദിനത്തിന്റെ ആദ്യദിവസം ക്ലാസ് കഴിഞ്ഞ് വീട്ടിലെത്തി വൈകുന്നേരം കൂട്ടുകാര്‍ക്കൊപ്പം കളികഴിഞ്ഞ് കാല്‍കഴുകാന്‍ കടവില്‍ ഇറങ്ങിയപ്പോള്‍ കാല്‍വഴുതി ഒഴുക്കില്‍പ്പെടുകയായിരുന്നു.
ബുധനാഴ്ച പുലര്‍ച്ചെ ഒരുമണിയോടെ കുട്ടിയെ കാണാതായ കടവില്‍നിന്ന് 700 മീറ്റര്‍ താഴെ പൂങ്കുടി പാലത്തില്‍നിന്ന് നിരീക്ഷണം നടത്തുകയായിരുന്ന നാട്ടുകാരാണ് ഒഴുകിവരുന്ന മൃതദേഹം കണ്ടത്. ഉടന്‍തന്നെ തൊട്ടുതാഴെ ചാലിയാറിലൂടെ തോണിയില്‍ തിരച്ചില്‍ നടത്തുന്നവര്‍ക്ക് വിവരം കൈമാറുകയും അവര്‍ കരയെത്തിക്കുകയുമായിരുന്നു. ജിദ്ദയില്‍ ജോലിചെയ്യുന്ന പിതാവ് വിവരമറിഞ്ഞ് നാട്ടില്‍ എത്തി. മാതാവ്: ഫൗസിയ. സഹോദരങ്ങള്‍: അന്‍സിദ്, അന്‍ഹ സഹറിന്‍.&nbsp;

കളികഴിഞ്ഞ് കാല്‍കഴുകാന്‍ ഇറങ്ങിയ വിദ്യാര്‍ഥി പുഴയില്‍ വീണ് മരിച്ചു

ആലപ്പുഴ: യു. പ്രതിഭ എംഎല്‍എയുടെ മകന്‍ കനിവ് ഉള്‍പ്പെടെ ഏഴുപേരെ കഞ്ചാവു കേസിലെ പ്രതിപ്പട്ടികയില്‍നിന്ന് ഒഴിവാക്കി എക്‌സൈസ് അമ്പലപ്പുഴ കോടതിയില്‍ കുറ്റപത്രം നല്‍കി. തെളിവുകളുടെ അഭാവത്തിലാണ് ഇവരെ ഒഴിവാക്കിയത്. കനിവ് ഉള്‍പ്പെടെ ഒന്‍പതു പേരാണു കേസില്‍ ഉള്‍പ്പെട്ടത്.
ഡിസംബര്‍ 28-ന് കുട്ടനാട് എക്‌സൈസ് സംഘമാണ് കനിവിനെയും സുഹൃത്തുക്കളെയും തകഴിയില്‍നിന്ന് മൂന്നുഗ്രാം കഞ്ചാവുമായി പിടിച്ചത്. ഒന്നാംപ്രതിയില്‍ നിന്ന് കഞ്ചാവും രണ്ടാംപ്രതിയില്‍ നിന്ന് കഞ്ചാവുപയോഗിക്കുന്ന ഉപകരണവും കണ്ടെത്തി. മറ്റുപ്രതികള്‍ കഞ്ചാവുപയോഗിച്ചെന്നാണ് മഹസറില്‍ രേഖപ്പെടുത്തിയത്. ഇവരുടെ നിശ്വാസവായുവില്‍ കഞ്ചാവിന്റെ ഗന്ധമുണ്ടായിരുന്നുവെന്നും രേഖപ്പെടുത്തിയിരുന്നു.
കേസെടുത്തത് കുട്ടനാട് എക്‌സൈസ് സംഘമാണെങ്കിലും വിവാദമായപ്പോള്‍ എക്‌സൈസ് നര്‍കോട്ടിക്ക് വിഭാഗം ഏറ്റെടുത്തു. വൈദ്യപരിശോധന നടത്താത്തതിനാല്‍ പ്രതികള്‍ കഞ്ചാവുപയോഗിച്ചെന്ന് ശാസ്ത്രീയമായി തെളിയിക്കാനായില്ല.കഞ്ചാവുപയോഗിക്കുന്നതു കണ്ടതായി പരിശോധന നടത്തിയ എക്‌സൈസ് ഉദ്യോഗസ്ഥരും മൊഴി നല്‍കിയില്ല. കേസില്‍ മറ്റു സാക്ഷികളുമില്ലായിരുന്നു. ഈ സാഹചര്യത്തിലാണ് ആദ്യ രണ്ടു പ്രതികളൊഴികെയുള്ളവരെ ഒഴിവാക്കി നര്‍കോട്ടിക് സിഐ. എം. മഹേഷ് കുറ്റപത്രം നല്‍കിയത്.

കഞ്ചാവ് കേസ്: യു. പ്രതിഭയുടെ മകനുള്‍പ്പെടെ ഏഴുപേരെ ഒഴിവാക്കി കുറ്റപത്രം

മലപ്പുറം: ഉപതിരഞ്ഞെടുപ്പ് ദിവസമായ 19ന് നിലമ്പൂർ നിയമസഭാ മണ്ഡലത്തിൽ തിരഞ്ഞെടുപ്പ് കമ്മിഷൻ പൊതുഅവധി പ്രഖ്യാപിച്ചു. തിരഞ്ഞെടുപ്പിന് 48 മണിക്കൂർ മുമ്പ് ഡ്രൈഡേയും പ്രഖ്യാപിച്ചിട്ടുണ്ട്. മണ്ഡലത്തിലെ വിദ്യാലയങ്ങൾക്കും സർക്കാർ സ്ഥാപനങ്ങൾക്കും അവധിയായിരിക്കുമെന്നും മുഖ്യ തിരഞ്ഞെടുപ്പ് കമ്മിഷണർ ഡോ. രത്തൻ യു. ഖേൽക്കർ അറിയിച്ചു.
പ്രധാന മുന്നണികൾക്കൊപ്പം മുൻ എം.എൽ.എ പി.വി. അൻവറും തിരഞ്ഞെടുപ്പിൽ സ്ഥാനാർത്ഥിയായത് ശക്തമായ മത്സരത്തിലേക്ക് നിലമ്പൂരിനെ എത്തിച്ചിട്ടുണ്ട്. അടുത്ത നിയമസഭാ തിരഞ്ഞെടുപ്പിന് മാസങ്ങൾ മാത്രം ശേഷിക്കെയാണ് നിലമ്പൂർ ഉപതിരഞ്ഞെടുപ്പിന് വേദിയാകുന്നത്. യു.ഡി.എഫ് സ്ഥാനാർത്ഥിയായി ആര്യാടൻ ഷൗക്കത്തും എൽ.ഡി.എഫ് സ്ഥാനാർത്ഥിയായി എം. സ്വരാജും ബി.ജെ.പി സ്ഥാനാർത്ഥിയായി മോഹൻ ജോർജുമാണ് മത്സര രംഗത്തുള്ളത്.

ഉപതിരഞ്ഞെടുപ്പ് ; ജൂൺ 19ന് നിലമ്പൂരിൽ പൊതുഅവധി പ്രഖ്യാപിച്ചു

ഭോപ്പാല്‍: മധുവിധുവിനായി മേഘാലയയില്‍ പോയതിനിടെ കാണാതായ ദമ്പതിമാരില്‍ ഭര്‍ത്താവിന്റെ മൃതദേഹം കണ്ടെത്തി. മദ്ധ്യപ്രദേശിലെ ഭോപ്പാല്‍ സ്വദേശിയായ രാജാ രഘുവംശിയുടെ മൃതദേഹമാണ് കണ്ടെത്തിയത്. ഇയാളുടെ ഭാര്യ സോനം എവിടെയാണെന്നത് സംബന്ധിച്ച് ഇനിയും ഒരു വിവരവും ലഭിച്ചിട്ടില്ല.&nbsp;
രാജയുടെ മൃതദേഹത്തിന് സമീപത്ത് നിന്നും മാരകായുധമായ ഒരു വിടിവാളും തകര്‍ന്ന് പോയ ഒരു സ്മാര്‍ട്‌ഫോണും കണ്ടെത്തിയിട്ടുണ്ട്. മെയ് 23നാണ് ചിറാപുഞ്ചിയില്‍വച്ച് ഇവരെ കാണാതായത്. വടിവാള്‍ ഉപയോഗിച്ചാണ് രാജാ രഘുവംശിയെ കൊലപ്പെടുത്തിയതെന്ന് പൊലീസ് പറഞ്ഞു. അതേസമയം, ഭാര്യ സോനത്തിനായുള്ള തെരച്ചില്‍ തുടരുകയാണെന്ന് പൊലീസ് വ്യക്തമാക്കി. രാജയാണ് മരിച്ചതെന്ന് മൃതദേഹം കണ്ടശേഷം ഇയാളുടെ സഹോദരന്‍ സ്ഥിരീകരിച്ചിട്ടുണ്ട്.അതേസമയം മരണം സംബന്ധിച്ച് കൂടുതല്‍ വിവരങ്ങള്‍ ലഭിക്കണമെങ്കില്‍ പോസ്റ്റ്മാര്‍ട്ടം റിപ്പോര്‍ട്ട് കൂടി ലഭ്യമാകേണ്ടതുണ്ടെന്ന് ഇന്‍ഡോര്‍ ഡെപ്യൂട്ടി കമ്മീഷണര്‍ രാജേഷ് കുമാര്‍ തൃപാഠി പറഞ്ഞു. ചിറാപുഞ്ചിയില്‍ എത്തിയപ്പോള്‍ രാജയും സോനവും വീട്ടില്‍ വിളിച്ച് സംസാരിച്ചിരുന്നു. പിന്നീട് ഒരു വിവരവും ലഭിച്ചില്ല. ഇവരെ ആരോ തട്ടിക്കൊണ്ടുപോയതാണെന്നാണ് കുടുംബം ആരോപിക്കുന്നത്. മേയ് 11നായിരുന്നു ഇവരുടെ വിവാഹം.

മധുവിധുവിനായി മേഘാലയയില്‍ പോയ ദമ്പതികളെ കാണാതായ സംഭവം;ഭര്‍ത്താവിന്റെ മൃതദേഹം കണ്ടെത്തി,ഭാര്യക്കായി തിരച്ചിൽ

വെള്ളരിക്കുണ്ട് (കാസര്‍കോട്): നാലാം ക്ലാസിലുണ്ടായ ഒരു അടി, അതിന് പ്രതികാരം അറുപത്തിരണ്ടാം വയസ്സില്‍. മാലോം ടൗണിനടുത്ത് താമസിക്കുന്ന വെട്ടിക്കൊമ്പില്‍ വി.ജെ. ബാബുവാണ് പരാതിക്കാരന്‍. ബാലകൃഷ്ണന്‍, സുഹൃത്ത് മാത്യു വലിയപ്ലാക്കല്‍ എന്നിവരുടെപേരിലാണ് കേസ്. ബാലകൃഷ്ണന്‍ ഷര്‍ട്ടിന്റെ കോളറില്‍ പിടിച്ചുനിര്‍ത്തുകയും മാത്യു കല്ലുകൊണ്ട് കവിളിലും പുറത്തും ഇടിക്കുകയുമായിരുന്നെന്നാണ് റിപ്പോര്‍ട്ട്. നാലാംതരത്തില്‍ ബാബുവും ബാലകൃഷ്ണനും ഒരേ ക്ലാസിലായിരുന്നു. ഇടയ്ക്ക് വഴക്കിടുകയും അടിപിടി കൂടുകയും ചെയ്തിരുന്നതായി ബാലകൃഷ്ണന്‍ വെള്ളരിക്കുണ്ട് പോലീസിന് നല്‍കിയ മൊഴിയില്‍ പറയുന്നു.
അന്ന് ബാബു തന്നെ മര്‍ദിച്ചതിലുള്ള വിരോധമാണ് ഇപ്പോള്‍ അടിപിടിയിലേക്ക് നയിച്ചതെന്നും ബാലകൃഷ്ണന്റെ മൊഴിയിലുണ്ട്. ജൂണ്‍ രണ്ടിന് ഒരുമണിക്ക് മാലോത്ത് ടൗണില്‍ ഹോട്ടലിനുമുന്നിലായിരുന്നു സംഭവം. പഴയ പിണക്കത്തിന്റെപേരില്‍ ഇരുവരും തമ്മില്‍ മുന്‍പും വാക്കേറ്റമുണ്ടായതായി പറയുന്നു.

ഇത് അപൂർവ്വ പ്രതികാരം;നാലാംക്ലാസിൽ കിട്ടിയ തല്ലിന് 62-ാം വയസ്സിൽ തിരിച്ചടി,ഒടുവിൽ കേസ്‌

ചാലക്കുടി: ഓടിക്കൊണ്ടിരുന്ന തീവണ്ടിയില്‍നിന്ന് ചാലക്കുടി പുഴയില്‍ വീണ അധ്യാപിക മരിച്ചു. ചെറുതുരുത്തി ഗവ. ഹയര്‍ സെക്കന്‍ഡറി സ്‌കൂള്‍ ഹയര്‍ സെക്കന്‍ഡറി വിഭാഗം അധ്യാപികയും ചാലക്കുടി തിരുത്തിപ്പറമ്പ് ഉപ്പത്തിപറമ്പില്‍ സുബ്രന്റെ മകളുമായ സിഡോള്‍ (സിന്ധു -40) ആണ് പുഴയില്‍ വീണ് മരിച്ചത്. പുഴയിലേക്ക് ചാടിയതാണെന്ന് സംശയിക്കുന്നു.
നിലമ്പൂരില്‍നിന്ന് കോട്ടയത്തേക്ക് പോകുകയായിരുന്ന പാസഞ്ചര്‍ തീവണ്ടി ബുധനാഴ്ച രാത്രി ഏഴുമണിയോടെ ചാലക്കുടി പാലത്തിലെത്തിയപ്പോഴാണ് ഇവര്‍ പുഴയിലേക്ക് വീണത്. പാലത്തിനു കുറേ അകലെ അന്നനാട് കുടുങ്ങപ്പുഴ അമ്പലക്കടവ് പരിസരത്തുനിന്നാണ് രാത്രി 9.35-ഓടെ മൃതദേഹം കണ്ടെത്തിയത്.ചാലക്കുടിയില്‍ ഇറങ്ങേണ്ട ഇവര്‍ അവിടെ ഇറങ്ങിയിരുന്നില്ല. ചാലക്കുടി പുഴയ്ക്ക് മുകളിലൂടെയുള്ള മേല്‍പ്പാലത്തില്‍ ട്രെയിനെത്തിയപ്പോള്‍ ഇവര്‍ എടുത്ത് ചാടുകയായിരുന്നുവെന്നാണ് ദൃക്സാക്ഷികള്‍ പറയുന്നത്. റെയില്‍വേ പാലത്തിന് മുകളില്‍നിന്നിരുന്ന യുവാക്കളാണ് സംഭവം കണ്ടത്. ഇവര്‍ ഉടന്‍ പോലീസില്‍ വിവരം അറിയിച്ചു. തുടര്‍ന്ന് പോലീസും ഫയര്‍ഫോഴ്സും തിരച്ചില്‍ നടത്തിയാണ് മൃതദേഹം കണ്ടെത്തിയത്.&nbsp;

ഓടിക്കൊണ്ടിരുന്ന തീവണ്ടിയില്‍നിന്ന് ചാലക്കുടി പുഴയില്‍വീണ അധ്യാപിക മരിച്ചു

പടിയൂര്‍ (തൃശ്ശൂര്‍): വീടിനുള്ളില്‍ അമ്മയുടെയും മകളുടെയും മൃതദേഹം അഴുകിയനിലയില്‍ കണ്ടെത്തി. പടിയൂര്‍ പഞ്ചായത്തോഫീസിനടുത്ത് വാടകയ്ക്ക് താമസിക്കുന്ന കാറളം വെള്ളാനി സ്വദേശി കൈതവളപ്പില്‍ മണി (74), മകള്‍ രേഖ (43) എന്നിവരെയാണ് ബുധനാഴ്ച ഉച്ചതിരിഞ്ഞ് മരിച്ചനിലയില്‍ കണ്ടെത്തിയത്. പരേതനായ പരമേശ്വരനാണ് മണിയുടെ ഭര്‍ത്താവ്.
ബുധനാഴ്ച ഉച്ചയോടെ വീട്ടില്‍നിന്ന് ദുര്‍ഗന്ധം വന്നതിനെത്തുടര്‍ന്ന് അയല്‍വാസികള്‍ ഇരിങ്ങാലക്കുട ബോയ്സ് സ്‌കൂളിലെ ജീവനക്കാരിയായ മൂത്തമകള്‍ സിന്ധുവിനെ വിവരമറിയിച്ചു. സിന്ധു വീട്ടിലെത്തി പിറകുവശത്തെ വാതില്‍ തുറന്ന് അകത്തുകയറി. വീടിനുള്ളില്‍ സാധനങ്ങള്‍ അലങ്കോലമായ നിലയിലായിരുന്നു.&nbsp;
ആറുമാസം മുന്‍പാണ് ഇവര്‍ പടിയൂരില്‍ വീട് വാടകയ്‌ക്കെടുത്ത് താമസമാരംഭിച്ചത്. അതിനുശേഷം രേഖ കോട്ടയം സ്വദേശിയായ പ്രേംകുമാറിനെ വിവാഹം കഴിച്ചു. രേഖയുടെ രണ്ടാമത്തെ വിവാഹമാണിത്. രണ്ടുദിവസം മുന്‍പ് രേഖ ഭര്‍ത്താവിന്റെപേരില്‍ വനിതാ സ്റ്റേഷനില്‍ പരാതി നല്‍കിയിരുന്നതായി സിന്ധു പോലീസിനോട് പറഞ്ഞു. തിങ്കളാഴ്ച ഇരുവരെയും വിളിപ്പിച്ച് കൗണ്‍സിലിങ്ങിനെത്താന്‍ നിര്‍ദേശം നല്‍കിയിരുന്നു.പോലീസ് സ്റ്റേഷനില്‍നിന്ന് വീട്ടിലേക്കു മടങ്ങിയശേഷം അമ്മയെ ഫോണില്‍ ബന്ധപ്പെടാന്‍ ശ്രമിച്ചെങ്കിലും സാധിച്ചില്ലെന്നാണ് സിന്ധു പറയുന്നത്. സംഭവത്തില്‍ ദുരൂഹതയുണ്ടെന്ന് സംശയിക്കുന്നതായി ബന്ധുക്കള്‍ പോലീസിനോട് പറഞ്ഞു. രേഖയുടെ മൃതദേഹത്തിനടുത്ത് നിന്ന് പ്രേംകുമാര്‍ എഴുതിയതെന്ന് കരുതുന്ന ഭീഷണിക്കത്ത് ലഭിച്ചതായും മരണം കൊലപാതകമാണെന്ന് സംശയിക്കുന്നതായും പോലിസ് പറഞ്ഞു.

അമ്മയുടെയും മകളുടെയും മൃതദേഹം വീടിനുള്ളിൽ അഴുകിയനിലയിൽ;കൊലപാതകമെന്ന് സംശയം

Search Results for: old age man